ORIENTERINGSCUP
Her finn du terminliste og informasjon om Sogndal IL sin orienteringscup og Vekas løype. Orienteringscupen er ein ny vri på treningane for 2026. Løypetilbodet er likt, men vi vil ha resultater, premiering og enkel servering.
I terminlista ser du og barne/ungdomstreningar, krinsløp i Sogn og Fjordane og nasjonale løp der krinsen organiserer reise.
Meir info om barnetreningane på tysdagar finn du på sida O-trening for barn og unge og i Spond-appen.
Påmelding orienteringscup: Klikk på knappen under.
Det er og mogleg å melde seg på ved oppmøte, men det lettar jobben for tidtakarane jo fleir som melder seg på i Eventor.
Førehandspåmeldinga er open til løpsdagen kl. 15. Har du eigen brikke, sjekk at nummeret stemmer i påmeldinga.
Orienteringscup
Torsdagar er det orienteringscup med fri start mellom kl 17:00 og 18.00. Løpa går på ulike kart rundt Sogndal. Sjå oppmøtestad i terminlista.
Påmelding ved oppmøte. Dei som ønskjer tidtaking bør helst starte før kl. 17:30.
Cup-løpa passar alle aldersgrupper og nivå, med breidt utval av løyper for både ungar, ungdom og vaksne
Valfritt å springe på tid eller utan tidtaking
Du kan springe aleine eller saman med andre
Løpa er ope for alle. Gratis for medlemmar i o-gruppa
Enkel servering etter løpa
Premie til alle under 10 år
For ungdom og vaksne over 10 år er det premiering til dei som fullfører minst 5 løp på våren og 4 på hausten
Ta med deg familien, ein ven eller kollega og kom og bli med!
Det er oftast fem løyper å velje i, frå nybyrjar til ekspert:
Nybyrjar (1,5 km)
Lett øvd (2 km)
Vidarekomen (3,5-4 km)
Ekspert kort (3,5 km)
Ekspert lang (5 km)
Ønskjer du litt opplæring i bruk av kart og kompass, eller har du andre spørsmål kan du spørre arrangøren ved oppmøte så får du hjelp.
Alle løpa blir annonsert med meir detaljert info om oppmøte, parkering m.m. på facebooksida vår: Orienteringsgruppa i Sogndal IL
Betaling: Du kan enten betale avgift for enkeltløp eller årsavgift til o-gruppa. Sjå meir info på sida Medlemsskap/treningsavgift.
Vekas løype - spring når du vil!
Løypene frå orienteringscupen heng ute i ei veke etter kvart løp. Du får umiddelbar tilgang til pdf av karta ved å sende e-post til vekasloypesogndal@gmail.com
PS: Det kan hende tenesta ikkje er oppdatert med vekas løype før litt ut på fredagen.
Livelox, UsynligO og O-range
Vi legg ut dei fleste av våre treningar og andre løp på Livelox og UsynligO.
Livelox er ei netteneste for å laste opp GPS-spor og sjå korleis du og andre har løpt. Det er gratis å laste opp spor og sjå enkeltløparar ein og ein, men ein må betale abonnement for å sjå “fellesstart” med fleire løparar samtidig, og få tilgang på diverse analysefunksjonar.
Du må ha ein brukar for å laste opp spor, og i innstillingane kan du kople Livelox-brukaren til Garmin Connect eller andre GPS-klokke-appar slik at spor frå løp du har deltatt på automatisk blir henta inn i Livelox. Har du brukar i påmeldingssystemet Eventor kan du bruke denne også på Livelox ved å gå til Eventor og trykke på dei ni kvite firkantane øvst til høgre, også klikke på Livelox (du må gå inn på denne måte, via Eventor, for at innlogging med Eventor-brukar skal funke). Om du ikkje har og ikkje ønskjer Eventor-brukar kan du heller lage ein brukar direkte i Livelox.
UsynligO er ein app som ved hjelp av gps-en i mobilen din “plingar” når du er på posten. Slik blir det mogleg å springe løypene også etter postane er tatt inn. Merk at appen ikkje er 100% nøyaktig, og kan plinge 20-30 m “feil” i skogen. Appen er gratis og tilgjengeleg for alle. Vi oppmodar alle om å legge att namn i resultatlista på appen slik at me kan få med alle som brukar løypene inn i vår statistikk.
Har du ei litt nyare Garmin GPS-klokke kan du installere appen O-range, som fungerer på same måte som UsynligO, men du får da løypa direkte inn på klokka og slepp å ha med deg mobilen i skogen. O-range lar deg laste inn alle løyper som ligg i Livelox. Når du har logga inn går du på fanen “Livelox” og søkjer på “Sogndal” for å finne våre løp. Appen finst både gratis og i betalt versjon, men den gratis versjonen er tilstrekkeleg for å springe vanlege løyper.
